利物浦今期「流」行

利物浦今期「流」行

成隊利物浦知道謝拉特唔肯續約之後，曾經講過話要殺入盃賽決賽送別呢位「神奇隊長」，所以嚟到英足盃8強重賽再遇布力般流浪，照計成隊波都會汲取番上次和波嘅教訓，生生性性贏波入準決賽嘅！（周三29，now621、633及668台周四2:45am直播）

接連輸俾曼聯同埋阿仙奴之後，利物浦喺英超同「前4」已經相差8分咁多，想攞到下季嘅歐聯資格仲難過中六合彩，而主帥班頓羅渣士當然知道自己嘅帥位已經岌岌可危，難得佢哋喺英足盃仲苟延殘存，另外成班「紅衫軍」亦話過要殺入決賽，落到場點都會加多兩錢肉緊嘅。

謝拉特停賽非壞事

冇錯今晚利物浦缺少三大主力，謝拉特、史卡迪爾，甚至係安利簡恩都要繼續停賽，不過見唔到前者反而係件好事！始終謝拉特下個月生埋日就35歲嘞，今季落到場明顯同加利仔一樣有三大缺點，就係跑得慢、冇速度，同埋唔夠快，要驚嘅反而係驚後防大佬史卡迪爾同埋安利簡恩停賽對防線有唔少影響，好似上場作客阿仙奴見到高路托尼係咁送禮，而半場入替嘅荷西安歷基明顯唔識防守，搞到龍門米洛列特多次出醜。

紅軍二線兵去到盡

而史達寧亦喺上場浪費唔少機會，好明顯係受到續約嘅問題影響到落場表現，而呢位近期是非纏身嘅球星可能會避吓風頭，今晚未必會俾班頓羅渣士派落場，不過又唔使擔心利物浦冇咗佢就唔識入波，始終今場英足盃嘅對手只係嚟自英冠中游嘅布力般流浪，要佢哋贏車路士、曼城，同埋其他英超球隊就話冇乜可能啫，不過要贏一隊英冠仔，派番史杜列治、列基林拔，甚至係波連尼落場都已經綽綽有餘啦，所以呢場英足盃應該可以贏波殺入準決賽，係驚史卡迪爾同埋安利簡恩缺陣，後防唔夠穩搞到「僅僅熟」啫。