皇馬主場「格」殺勿論

皇馬主場「格」殺勿論
 
喺西甲被巴塞趕過嘅皇家馬德里，今周自然要全力爭取3分以免被進一步放離，好在今周佢哋只需喺主場迎戰CF格蘭納達，初盤讓2球依然信心十足。（周日13，now632台周日6:00pm直播）

皇馬喺國際賽賽期前作客1:2輸俾巴塞，積分上已被對手趕過，如果唔想冇埋呢隻盃，餘下比賽已不容有失。好在，皇馬今季對住中下游球隊一向有把握，最近失分俾維拉利爾同巴塞，但對住拉科、艾爾切同埋利雲特就全勝兼順利保持清白之身，證明等閒球隊要攻破佢哋防線絕對唔容易。至於陣容方面，C朗、賓施馬同巴利呢個BBC組合喺國際賽都冇受傷，最緊要係中場核心莫迪歷已復出，加埋踢完國際賽相信狀態已進一步操起，有佢在陣皇馬中前場組織肯定有所增強，配合主場之利有力大勝一場振士氣。

格蘭納達級數低

客軍CF格蘭納達聯賽排第19位，護級壓力好大，但有時有鬥志唔代表大晒，睇佢哋踢到依家都係贏得4場波，聯賽作客仲要12場冇贏過，就知級數同銀河艦隊真係差好遠；再講，格軍今周仲有射手阿祖安哥倫加缺陣，點睇都唔似可以偷雞。