華倫西亞成功突「維」

華倫西亞成功突「維」

本來都以為西甲三強大定，點知突然殺出一支華倫西亞搞亂檔，佢哋依家唔止領先馬體會1分排第3，其實同榜首巴塞都只差8分，而且華倫仲未打巴塞皇馬，如果季尾幾場6分波贏晒有奇跡出現都唔奇，不過大前題都係今晚搞掂維拉利爾先，黃色潛艇已經4場不勝，早就脫離爭前四行列，不過相對計歐霸位就好穩陣，現時未必夠戰意同華倫一戰，主隊應該可以再取3分繼續威脅西甲雙雄。（周日32，now632台周日11:00am直播）

季初我都同大家講過，華倫西亞呢隊波今季肯定有驚喜，因為球會財政問題解決咗，又有一大班青訓球員上位，唯一弱點在於球隊太年輕冇領軍人物，所以季初都仲有啲起伏，不過真係估唔到，去到季中時間，華倫連呢個唯一問題都解決埋，中場查維富亞高為球隊帶來穩定性，球隊對上7場賽事贏6場，僅失3球，戰績比皇馬巴塞有過之而無不及。
當然華倫都唔係冇問題存在，踏入下半季，幾個前鋒入球產量大減，近7場波，華倫所有入球中，只有3球來自前鋒線，如果季尾真係要追上去，柏高艾卡沙等真係要快啲重拾射門鞋，而今晚對住維拉利爾，真係正好係時間打番起狀態。

維拉利爾兩頭唔到岸

維拉利爾季初一度上到第4位，不過兵力所限打兩條戰線，現時喺第6位都冇辦法，而佢哋今場有卓利舒夫、域陀雷斯及般奴蘇利安奴幾個主力有傷避戰，更加削弱戰力，而睇番佢哋因應排名上比第8畢爾包多10分，歐霸席位都幾穩陣，戰意成疑下隨時喺馬斯泰拿大敗一場。