阿仙奴名「利」雙收

阿仙奴名「利」雙收

星期六晚咁多場賽事，咩列強都好，都肯定唔及早波呢場阿仙奴對利物浦咁精彩；阿仙奴近十幾場只輸過俾摩納哥，本土賽事幾乎未輸過，呢場人腳完整加上主場之利，點計都秤先過利物浦；而紅軍今場缺幾員大將，前中後三線都不整，阿仙奴應該可以喺呢場波，鎖定前四席位。（周六16，now621台周六7:45am直播）

利物浦上場輸俾曼聯，謝拉特又再增加經典場面profile，出場不足1分鐘被紅牌趕出場，繼上季跣走冠軍之後今次就剷走前四，而呢個神奇隊長趁上星期國際賽期，舉行咗自己嘅告別賽，嗰場波佢聯同蘇亞雷斯同費托齊齊上陣，賽後佢話好遺憾，未曾試過同時間三人一齊夾檔，真係唔知兩個前鋒係咪都係咁諗喎！

利物浦三線皆缺主力

謝拉特打多咗場波會唔會消耗多咗體力，利迷又唔使擔心，因為呢場佢同史基迪爾齊齊停賽，而史杜列治有傷，雖然已經通過體測，但狀態肯定有限，所以話利物浦呢場前中後三線都有主力缺陣唔係講笑，而過去利物浦作客阿仙奴又輸多贏少，呢場真係非常下風。

阿仙奴陣內再無傷兵

相比起紅軍，阿仙奴季尾個氣勢真係只可以用勢如破竹嚟形容，對上10場聯賽，佢哋只輸過俾熱刺，其餘9戰全勝，恐怖在連基奧特都可以打得生，近5場聯賽入咗6球，而更加十年難得一見嘅係，阿仙奴呢場幾乎冇傷兵，當然幾個長期受傷球員未有狀態落場，但包括阿迪達、韋舒亞、迪布基甚至文員迪亞比，都已經復操，今晚就算未能上陣，都已經夠雲格開心。
賽前紅軍落後阿仙奴6分，落後曼聯5分，今場唔好講和波，如果輸波真係完全失去競逐前四機會，所以唔需要擔心紅軍會唔敢攻，而兵工廠呢期最叻打反擊，利物浦防線速度冇可能守得住山齊士及禾確特等，如紅軍先失波睇怕只會愈輸愈多。