世界盃2026：耶馬孭飛零舍搶韁 狂牛拉唔住半大炸場_星島日報

世盃H組尾輪大戰，由烏拉圭硬撼西班牙。烏拉圭頭2輪未贏過，為搶分出線今仗要焗攻，但谷得太前隨時暴露更多空位，畀以拉明耶馬為首嘅「狂牛」有機可乘，呢班波初段零舍搶韁，1.5球半場大值得捧場。

（Now 618、616及馬會指定場外投注處周六早上8時直播）文:法達斯維

烏拉圭雖然由經驗豐富嘅老帥比爾沙執教，但今屆表現唔多對辦，頭2輪對住實力較弱嘅沙特阿拉伯同佛得角，諗住執豆咁執，點知全部打和，尤其係上仗鬥佛得角，一度反先2比1情況下，馬泰斯奧利華拉於後場竟作出自殺式回傳，造就對手追成2比2，輸呢類波都幾打擊士氣。

烏拉圭爭次名非勝不可
依家烏拉圭與佛得角同得2分，但佛得角尾輪只係對沙特，以佢哋個勢贏波唔奇，到時佛軍便有5分，烏拉圭若想爭頭2名就非勝不可，退一步攞1分博最佳第3名，又要視乎其他組情況，咁樣好被動，但無論如何都要焗攻搶分，因為輸波就只得2分，肯定無法取得最佳第3名。

另邊廂，西班牙經過首輪被佛得角悶和0比0，次輪對沙特有王牌拉明耶馬復任正選，立即生猛晒，輕輕鬆鬆派4蛋，2戰獲4分排榜首，耶馬上半場已有士哥，奧耶沙巴爾更梅開二度，佢哋兩個半場合共入咗3粒，玩謝沙特奠定勝局，耶馬下半場即被換走，真係錫住嚟用畀佢抖到夠。由於烏拉圭空群而出，實有大把空位畀耶馬打快攻，加上「狂牛」近4仗3次半場開2球或以上，半場大更可取。