熱身賽：派牌宗師切磋冇保留 克羅地亞比利時大顯身手_東方日報

兩支世盃決賽周球隊將於今晚熱身賽交鋒，克羅地亞主場迎戰比利時，雙方同樣擅長踢進攻足球，而且大家都有派牌宗師在陣，攻擊力有保證，不過克羅地亞踢法有前冇後，近5場總入球全開3球或以上；至於比利時同樣試陣為主，預料亦唔會太着緊防守，兩軍盡情進攻冇保留，首選中位數2.5球嘅入球大。（Now 630及618周三凌晨零時直播）文:Mic少

雖然克羅地亞鋒線缺乏高效射手，但勝在擁有「黃金中場」，包括AC米蘭老將莫迪歷、國際米蘭新星比達蘇錫、曼城球星高華錫，仲有今季喺科木有出色發揮嘅巴杜連拿，佢喺意甲29次上陣入6球及3次助攻，成為科木爆冷奪得下屆歐聯入場券嘅功臣之一，被譽為「新莫迪歷」。

黃金中場創造力十足
克羅地亞中場有幾位「派牌高手」助陣，創造力十足，可以組織流暢攻勢，近5場比賽合共入12球，但防線不穩，近4場都有失波，甚至主場對住弱隊法羅群島，都未能保持清白之身，上仗同巴西鬥攻，亦以1比3敗陣，今次「格仔兵團」遇上世界排名第9位嘅比利時，後防勢必承受沉重壓力。

另邊廂，比利時球星如雲，特別係鋒線擁有盧卡古、李安度杜沙特、謝利美杜古等猛將，加上佢哋都有「派牌宗師」奇雲迪布尼喺中場策劃攻勢，入球能力有保證。事實上，比利時踢熱身賽亦毫不留力，包括3月底以5比2大勝美國，預料今仗會繼續採取開放式踢法，畀球員喺決賽周揭幕前，享受快樂進攻足球，有望合演入球騷。