自由盃：和波即首名出線天大歎慢板細在必行_東方日報

聽朝自由盃分組賽煞科，其中D組阿根廷小保加主場迎戰智利天主教大學。雖然小保加要贏波先有機會出線，但無論近況或攻力都麻麻，一定要穩中求勝，相反天主教大學唔輸都收貨，必定踢得保守大歎慢板，捧2.5球入球細最上算。

（HOY 76台周五早上8時30分直播）文:法達斯維

先講講D組形勢，除咗包尾大幡SC巴斯隆拿肯定出局外，其餘3隊仍有機會出線，天主教大學以10分排榜首，領先高士路2分及小保加3分，由於同分先計對賽成績，小保加對高士路只得1和1負，唯一慶幸係首循環對天主教大學贏2比1，對賽佔上風，如果想出線，先唔好理高士路嗰邊任何賽果，今仗要做好贏波本分，追到與天主教大學同分，並藉較佳對賽成績晉級。

小保加攻力疲弱
不過，小保加本身狀態好一般。佢哋各項賽事近5場只得1勝2和2負，入得4粒，其中4場開2球或以下，就算只計自由盃，5場只得2勝1和2負，僅入6粒，近3場全開2球或以下，攻力認真麻麻，今仗必定先求穩陣，睇準機會拮對手一刀。

另邊廂，天主教大學喺D組5場獲3勝1和1負，今仗任務好簡單，只要唔輸就肯定出線，由於對賽處劣勢，而且近期經常少交收，作客場合隨時踢得更保守，希望靠死守悶悶哋磨蝕對手戰意，相信戰情會陷於膠着，唔慌多波入，捧入球細啱數。