法足盃：盃賽出擊例搶韁朗斯半W速 擒尼斯_東方日報

法蘭西體育場今晚上演法足盃王者戰，由朗斯硬撼尼斯。朗斯唔單止實力同狀態贏晒，而且喺今屆法足盃例搶韁，加上尼斯有附加賽後顧之憂，相信朗斯今仗會先發制人，半場主勝有計。

（Now 639周六凌晨3時直播）文:法達斯維

朗斯今季表現出色，聯賽只係屈居班霸巴黎聖日耳門之下獲亞軍，並且喺法足盃見關過關，5場波法定時間獲4勝1和之餘，更狂轟16粒，並有4次喺上半場取得領先優勢，得以1998年後首度殺入決賽，之前3次喺決賽飲恨，令今次飢渴感更強，誓要一嘗捧盃滋味。同奧辛尼艾度亞迪、泰奧雲、韋斯利沙特為首嘅主力鋒線相比，後備嘅艾達拉施馬、辛特麥斯明喺法足盃亦貢獻不少，其中艾達拉施馬更有4粒進帳，不容忽視。

客軍爭護級大過天
另邊廂，尼斯今季聯賽淪落到排尾3，單計近9場正式賽事，贏得1場咁大把，嚟緊仲有兩回合附加賽出戰乙組聖伊天，呢個係爭取留級嘅最後機會，依家護級大過天，難怪主帥佩爾賽前表示，法足盃唔再係頭號目標，可見佢哋個心已經飛咗去附加賽，咁多後顧，對住全力出擊嘅朗斯，隨時半場都頂唔住。