亞冠二決賽：大阪飛腳態沉 艾納斯搶半Ｗ_東方日報

亞冠二決賽，艾納斯於主場同大阪飛腳爭霸。艾納斯周中沙特職臨天光瀨尿，未能提早贏得冠軍，C朗今仗肯定更加肉緊，希望贏得首個大賽錦標；大阪飛腳態沉，近7場只贏過1仗，加上艾納斯踢亞冠二非常搶韁，近8場亞冠二全部半場領先，推介半場主勝。（HOYTV 77台周日凌晨1時45分直播）文:渡邊年

葡軍主帥讚C朗弗
根據亞洲足協統計，兩軍進攻力都非常唔錯，大阪飛腳射門202次、艾納斯160次，分列榜首同次席，不過把握力就艾納斯好少少，呢支沙特豪門射入33球係各隊之冠，反觀大阪飛腳只係入25球，效率相對較低。

艾納斯球星京士利高文整個賽事上陣6場就射人6球，C朗喺亞冠二上陣3場，貢獻1入波同1助攻，不過今場決賽肯定搏盡爭取加盟後首個主要大賽錦標，況且葡萄牙國家隊主帥馬天尼斯日前專登飛去沙特，考察多位葡萄牙國腳嘅表現，大讚C朗水平真係冇下跌過。艾納斯近8場亞冠二全部半場領先，加上要顧及沙特職煞科對達馬克ＦＣ嘅爭冠關鍵戰，今場最好就係早早入波奠定勝局，預料一開波就會強攻飛腳。

飛腳近7場只係贏過1場，當中只有贏波一役保住不失，其餘6場有5次都係先被對手攻破大門，球隊喺亞冠二4強晉級過程較為驚險，首回合主場對住曼谷聯先輸0比1，去到次回合先至反勝；但今場作客對住艾納斯更加難踢，推介半場主勝。