西甲：今晚準備登基！巴塞勢破艦隊_東方日報

今晚西甲上演國家打吡，「一哥」巴塞隆拿主場迎戰「二哥」皇家馬德里。巴塞雖然缺少王牌拉明耶馬，但挾聯賽10連勝之勢，今仗唔輸即提早封王，對住軍心渙散嘅「銀河艦隊」，單計戰意已經贏晒，讓球盤就算讓到1球都冇有怕，一於捧上盤。（Now 632周一凌晨3時直播）文:臻贏特

巴塞之前接連於西盃同歐聯出局，好彩未有影響軍心，尤其係聯賽更加愈戰愈勇，近10場全部贏晒，包括自歐聯出局後，連贏切爾達、基達菲同奧沙辛拿，就算王牌拉明耶馬因傷提早收咧，仍然無阻呢股連勝走勢。依家聯賽剩餘4輪，巴塞已經甩開皇馬11分，今仗只要有分落袋，就可提早鎖定冠軍，仲要喺死敵面前奪冠，巴塞眾將一定搏甩髀。

曹亞文尼獲放生上陣
相比之下，皇馬要贏波先可阻止巴塞奪冠，但某程度只係拖延一下，以佢哋各項賽事近7仗僅得2勝2和3負嘅走勢，要後上奪冠極之渺茫。何況「艦隊」季尾頻頻爆出醜聞，包括魯迪格向艾華路卡利拉斯「兜巴星」、基利安麥巴比養傷期間拖女梳乎，最新仲有曹亞文尼同費達歷高華維迪動武，後者撞傷頭部引至今場無法上陣。雖然皇馬結案從輕發落，兩人公開道歉之餘只各罰款50萬歐元（約462萬港元），但就算曹亞文尼今場可以披甲，軍心都唔慌好得去邊，上盤可謂坐走望贏。