中岸水手放心「吼」實

中岸水手放心「吼」實
 
澳職今日有場獨腳戲由布里斯班獅吼迎戰中岸水手。兩隊波近排表現都唔係好，但獅吼有後亞冠盃後顧，球員對爭取季後賽席位似乎又唔係咁上心，水手呢場受讓到半一唔係冇機，下盤值捧。（周四1，有線64及203台周四5:00pm直播）
布里斯班獅吼依家排名第7位，距離殺入季後賽位置其實唔係好遠，但唔知點解佢哋成班球員就好似唔多上心咁，之前我哋講過對鳳凰場波佢哋落後下腰斬，最終按賽例被判輸，但成班球員似乎對賽事腰斬毫無感覺，再睇佢哋之後接連輸俾西悉尼流浪者同墨爾本城，其中對西悉尼場波更主場輸到1:4，真係左睇右睇今日都唔似有能力讓到咁辣啦。

中岸水手陣容完整

再講，獅吼其實緊接周中有場亞冠盃作客水原藍翼比賽，可能呢場先係佢哋目標都未定；至於陣容方面，麥特麥基同迪維利都被國家隊徵召今場唔可能候命，連呢兩位中後場主力都冇埋，獅吼想反底真係冇咁易。
中岸水手聯賽排第8位，其實都有機會爭取殺入季後賽，而佢哋近期表現都算合格，除咗輸俾兩支前列球隊阿德萊德聯以及墨爾本勝利，曾先後贏到墨爾本城以及迫和珀斯光輝，經歷呢段魔鬼賽程而攞到4分，以一支中游球隊嚟講算唔錯啦，今次對番同級球隊自然有把握搶分。事實上，水手整體陣容亦比主隊完整，佢哋冇球員俾澳洲國家隊撬走，前線法比奧費拉拿同施拿克腳風亦幾順，受讓到半一絕對有力贏波贏盤。