沙特職：艾拿積馬防線一衝就散 艾塔亞文神鋒大顯身手_東方日報

沙特職進入季尾，除咗爭標之外，護級形勢亦值得留意，包尾嘅艾拿積馬情況非常危急，今仗主場迎戰艾塔亞文，非勝不可，預料會豁出去搶攻。至於「沙特狼隊」艾塔亞文踢風流波，球員冇心理壓力，可以盡情表演悅目進攻足球，以艾塔亞文近4場總入球全開3球或以上，最好捧2.5球入球大。

（on.cc東網周五凌晨零時10分直播）文:Mic少

沙特職排名最低3位球隊將會降班，艾拿積馬落後尾四嘅達馬克FC12分，餘下6輪聯賽，想逃離降班區，機會非常渺茫。

不過，從另一個角度睇，艾拿積馬已經「冇嘢好輸」，可以放開懷抱進攻，搶得1分得1分，就算最終降班，起碼證明已經盡晒力，向球迷有所交代。事實上，艾拿積馬攻力不俗，早前遇上榜首艾納斯，都可以入到2球，但防線太脆弱最終大敗2比5，上場以2比1擊敗尼奧姆SC，結束6連敗頹勢，有助提升士氣，今場入波機會甚高。

羅渣馬天尼斯卡士超班
排喺沙特職第5位嘅艾塔亞文，已經無法取得下屆亞冠精英盃入場券，餘下賽事爭勝動力開始冇咁強，雖然球隊由2月開始成績持續回落，近10場聯賽只取得1勝5和4負，但當中偶有佳作，包括4月初作客打和第2位希拉爾2比2。

艾塔亞文隊內擁有唔少高質素外援，前鋒羅渣馬天尼斯曾經效力西甲球隊維拉利爾，佢今季聯賽已有20球進帳，射手榜排第4位，僅次於艾雲東尼（27球）、祖利安基洛尼斯（26球）、C朗（24球），以呢位31歲哥倫比亞球星嘅級數，艾拿積馬條脆弱防線隨時一撞即散，兩隊鬥攻可望合演入球騷。