哥連泰斯「奴」不可破

哥連泰斯「奴」不可破
 
自由盃B組另一場比賽係哥連泰斯主場對達奴比奧。兩隊波喺分組賽表現可以話差天共地，哥連泰斯3戰全勝，達奴比奧就3戰全敗，只要哥軍發揮水準，實在好難相信佢哋今場會遭遇滑鐵盧。（周三15，香港時間周四9:00am開賽）
哥連泰斯喺自己巴西省聯賽表現出色，而去到自由盃分組賽演出亦冇失色，佢哋先2:0輕取聖保羅、再嚟作客1:0搞掂聖羅倫素，到上輪作客達奴比奧就贏2:1，分組賽全部贏晒仲要有聖保羅同聖羅倫素兩大勁敵，賽績絕對係冇花冇假。
事實上，哥連泰斯近排火力亦相常驚人，對住卡比華蘭奴、波圖基沙同彭拿保蘭斯都攞到最少兩個或以上入球；陣容方面，荷西古里路、盧斯安奴尼維斯、連拿度奧古士圖、丹尼路以及古靴美安達迪亦全數可以候命，人腳咁完整實在睇唔到哥連泰斯有突然失準可能，放心捧場啦。

達奴比奧分組魚腩

客軍達奴比奧係烏拉圭代表，但佢哋級數明顯未夠應付自由盃比賽，分組首戰主場1:2輸俾聖羅倫素、作客0:4大敗俾聖保羅以及上輪主場不敵哥連泰斯，連有主場之利都唔夠打，作客真係好可能步之前對聖保羅後塵，再次大敗一場。
睇番人腳，達奴比奧陣中球員大多名不經傳，射手巴列圖喺拉素出身但完全冇出過場，其拍檔費拿羅利過往喺森多利亞同彭拿典奈高斯亦唔成功，鋒力咁弱難怪完全對同組對手冇威脅，聽朝出訪巴西睇怕都係九死一生。