聖羅倫素信心「保」證

聖羅倫素信心「保」證
     
雖然呢個星期係國際賽周，不過南美波一向都唔等人，南美自由盃明早繼續開打；呢一輪自由盃已經係分組賽第4輪賽事，上屆冠軍聖羅倫素開局一般，頭3場賽事只得3分，今場面對排第二位嘅聖保羅一定要贏，如果唔係同即時出局無異，聖保羅近6戰贏5場，陣內星味十足，不過聖羅倫素主場打巴西球隊向來有一手，平半盤絕對讓得起。（周三14，足智彩周四6:45am網上文字直播）

聖保羅對上幾年一直俾班年輕小將吸收經驗，到上兩季開始嚟料，加入幾個大佬級巴西國腳以老帶新，立即喺聯賽打出成績，雖然上屆都係屈居高士路之後，但今屆無論喺自由盃定國內聯賽都應有一番作為，不過今場作客聖羅倫素，佢哋都有隱憂，事關首席射手路爾斯法比安奴受傷避戰，雖然仍有柏圖、甘素及米高巴斯杜斯等前國腳，但埋門一腳質素必打折扣，，加埋冇咗卡卡派牌佢哋創造力始終差咁啲，聖羅倫素今場必有機會。

聖羅倫素擅鬥巴西隊

聖羅倫素為上屆自由盃冠軍，現時喺國內聯賽都係一哥，但偏偏現時喺分組賽只得3分陷出局危機。而事實上，佢哋喺國內聯賽連贏4場，狀態一定唔差，似乎早前連敗於兩支巴西球會下都係有啲失準，不過睇番佢哋上季，分組賽時頭3戰都係得4分，比現時唔好得幾多，而且奪冠過程上，先後擊敗保地花高、甘美奧同巴甲冠軍高士路，喺踢法上肯定唔怕任何巴西球隊，只要今場發揮正常，呢支衛冕冠軍應該有力喺聖保羅身上贏番一場。