歐霸盃：護級大過天森林半和頂住先_東方日報

英超兵諾定咸森林，於今晚歐霸盃8強次回合返主場再鬥波圖。森林首回合能夠打和，幸運成分居多，而且聯賽護級大過天，今仗戰意難料，佢哋近期主場旺半和，對住弗爆波圖會守住先，半場和好路。

（Now 638周五凌晨3時直播）文:法達斯維

從首回合可見，森林全場畀波圖撳住嚟打兼先開紀錄，點知對手馬添費蘭迪斯突然發波瘟，後場大腳回傳畀門將迪奧高哥斯達，又唔知佢企咗出嚟，就製造咗一個40碼嘅遠程烏龍波，咁樣和波擺明靠運。查實森林依家心繫聯賽護級，佢哋排緊第16位，只係領先尾3嘅熱刺3分，嚟緊下仗聯賽仲要對尾2嘅般尼，絕對搶分良機，再睇埋佢哋之前4仗歐霸盃僅1勝，晉級過程符符碌碌，不宜高估。

波圖作客唔敢冒進
另邊廂，波圖首回合咁樣被打和梗係好唔抵，以佢哋近7仗5勝2和咁弗狀態，睇嚟係更想出線嘅一隊，不過呢支葡超球隊客場總係打折扣，之前4場歐霸盃作客只得1勝2和1負，輸波嗰場正正係輸畀森林，今仗作客唔敢輕敵。翻查紀錄，森林各項賽事近7次主場出擊，有6次半場打和，明顯初段踢得非常保守，半場和不妨再追。