歐聯：領先1球未肯留手 拜仁食住上再爆艦隊_東方日報

歐聯8強最矚目對決，拜仁慕尼黑同皇家馬德里冇令球迷失望，首回合精彩鬥攻下，拜仁以2比1贏波先拔頭籌，今場次回合返主場出師，無論形勢同信心都佔盡上風。拜仁喺安聯球場出戰所向披靡，今屆歐聯主場全部贏得清脆俐落，再破「銀河艦隊」機會甚高，直取主勝。（Now 643周四凌晨3時直播）文:工廠仔

拜仁今屆表現具有冠軍相，聯賽階段8戰7勝排第2位，晉級淘汰賽後霸氣再提升，16強以總比數10比2狂勝阿特蘭大，上場作客巴拿貝球場亦無懼同皇馬鬥攻，鋒線有哈利卡尼、米高奧利斯、路易斯迪亞斯等鎖匙人，防線又有「定海神針」紐亞把關，攻守實力相當平均。

主場6連捷狂轟22球
拜仁近況巔峰，近13場比賽取得12勝1和，主場出擊豪取6連勝兼轟入22球，氣勢凌厲！就算喺歐聯賽場同樣打橫行，今屆5場歐聯全勝兼贏至少2球，而且目前有1球優勢喺手，戰術上可以針對性打擊「焗攻」嘅皇馬，以拜仁目前高昂士氣同信心，可以放膽進攻，一鼓作氣贏波晉級。

皇馬防線多甩漏
皇馬雖然係15屆歐聯盟主，但自從艾比路亞接任教練後，表現似乎不斷下滑，近3場賽事只得1和2負，士氣低落。即使前線有基利安麥巴比同雲尼斯奧斯祖利亞壓陣，但防線卻經常出現錯漏，而且防守中場曹亞文尼今場停賽，後防再少一道可靠屏障，對住拜仁嗰條犀利鋒線，想搶攻難免會顧此失彼，形勢絕不樂觀，主勝好路。