意英之戰「大」有作為

意英之戰「大」有作為

正所謂友誼波，古惑多！今晚得一場歐國盃外圍賽，其餘都係友賽，而強強對碰就有意大利對英格蘭呢一場；兩隊喺上年世界盃分組賽相遇，當時意大利贏2:1，不過今晚呢場雙方都好多主力缺陣，幾日之後又會再有聯賽開打，好難信雙方會喺呢場認真，不過大家開放式進攻應該會有唔少入球出現，鍾意睇入波嘅朋友就啱晒。（周二4，香港時間周三2:45am開賽）

踏入4月開始變番做夏令時間，睇波都冇咁辛苦，雖然今晚呢場大戰冇直播，不過科技咁發達，真係要睇相信都難唔到一眾球迷；不過今晚如果大家想睇球星，可能都真係會有啲失望，先講意大利，兩大中場迪羅斯及派路都冇再入選，而最有話題性嘅巴洛迪利，亦冇喺今次大軍出現；隊長保方上場冇打，不過由於今戰喺都靈進行比賽，保方都已歸隊操練，但未知會否冒險落場，呢隊星味一般嘅意軍，真係唔知會有幾多意大利Fans入場睇波呢？
不過留意呢場意大利對英格蘭嘅賽事其實別有意義，因為係意國足總重點宣傳反種族歧視運動嘅其中一個活動，佢哋希望透過呢場波教育意大利國民反種族歧視觀念。不過都幾神奇，成隊意大利最受歧視就係巴神，又點解唔選佢入隊呢？反而英軍黑人球員一向多，今次大軍入面有禾確特、史摩寧等，希望真係可以傳遞正面訊息。

英軍新丁多好鬥志

英格蘭踢完上場外圍賽已有多人因傷退隊，當中包括史達寧、韋碧克及占士米拿，換言之，呢場哈利卡尼的確好有可能正選披甲，以佢國家隊新丁身份，肯定希望繼續爭取表現，而佢熱刺隊友美臣都好有機會落場爭取表現，即係話雖然今場兩隊雖然稍欠星味，但部分球員夠鬥志，應該都可以製造唔少入球。