荷蘭出線現危機

荷蘭出線現危機

    曾幾何時，荷蘭係我最鍾意嘅球隊之一，當年十上十落嘅全能足球，躋身為歐洲足球強國。印象最深刻係荷蘭三劍俠，古列治、雲巴士頓及列卡特，仲有朗奴兄弟等世界級球星，當然唔少得更早之前嘅球王告魯夫。

    時至今日，“橙軍”依然係世界一級勁旅，今屆世界盃亦勇奪季軍，可惜命水問題，始終冇乜國際大賽命，與冠軍獎盃無緣。以為荷蘭在今屆世界盃有優異表現，可以借勢在明年歐國盃發圍，點知在外圍賽表現失準，分組賽主場迎戰土耳其又再失分。與榜首嘅捷克相差六分，出線已經出現危機。餘下五場比賽，“橙軍”的確一分都不能再失，否則連踢附加賽嘅機會都渺茫。

    點解荷蘭嘅表現突然之間咁反覆？相信最大因素係世界盃後。原主帥雲戈爾離隊，接任嘅軒迪克並非冇料之人，但始終都要經過磨合期。加上有洛賓、雲佩斯及倫斯三大攻擊手因傷缺陣，亦係荷蘭未能致勝嘅原因。

    如果歐國盃決賽周少咗荷蘭呢支勁旅，的確比較失色。希望“橙軍”能夠絕處逢生。