葡萄牙起“塞”唔易

葡萄牙起“塞”唔易

明晨繼續有歐國盃外圍賽，本澳特多“粉絲”嘅葡萄牙終於登場，將在主場迎戰塞爾維亞，只要能夠擊敗對手全取三分，就可升上I組榜首。

不過，睇返葡軍之前三場外圍賽兩勝一負嘅表現，認真差強人意。作客贏丹麥贏得驚濤駭浪；主場險勝弱隊亞美尼亞，同樣踢到一無是處，三分叫做執返嚟，根本踢唔出歐洲頂級勁旅風範。好話唔好聽，球隊並非真材實料，只係“成也C朗，敗也C朗”。除此之外，來來去去仍然靠柏比、蘭尼、艾美達、迪亞高及摩天奴等三十歲以上老將支撐大局，葡軍實在欠缺後起之秀。

塞爾維亞方面，以老帶新，由艾雲奴域、高拿洛夫及杜錫領軍，配合馬迪、馬高域、杜辛泰迪三名在英超揾食球星，其他球員亦效力歐洲五大聯賽球會，整體實力不容忽視。球隊目前兩戰只得一分，要保住出線希望，今仗絕對不能有失，必會與葡軍力拼到底。初盤葡萄牙讓一球，講到踢法與整體配合，塞爾維亞較為幼細及更有組織，葡萄牙未必讓得起。

推介：塞爾維亞1:0