意大利讓和「加」注捧

意大利讓和「加」注捧 
 
歐國外圍賽H組賽事，現時排榜首兩隊分別為克羅地亞同意大利，可以講係咁多組入面最正路嘅一組，而今晚意大利會作客保加利亞，如果順利贏波至少確立附加賽位置，肯定大大減輕干地壓力，保加利亞主場連馬爾他都贏唔到，呢場都好難爆冷，不過意大利對弱隊反而唔識入波，呢場幾有可能僅勝了事。（周六28，有線64及203台周日3:45am直播）

意大利分組賽除摸和克羅地亞外全勝，似乎佢哋都明白小組攞一二分別唔大，寧願放分俾實力份子克羅地亞，等兩隊快啲搶夠分出線更實際，不過問題係，意大利無疑喺呢個外圍賽打得幾好，但對阿塞拜疆、馬爾他，都只係僅贏1粒，保加利亞肯定唔會比呢兩隊弱，意大利都好難大勝，而今次意軍前鋒線上，恩莫比利、柏利都係死火球員，薩斯索羅前鋒薩沙又未夠經驗，似乎贏都係1球上落多。
另外克羅地亞就會主場出戰挪威，挪威現時排第三，簡單講呢場克軍一贏，而同時間意大利贏波嘅話，就會雙雙彈甩，所以如果挪威有心爭第二，呢場只許勝不許和，克羅地亞今戰都算齊腳，文迪蘇傑、拉傑迪及莫迪歷都在陣，中前場有保證應該可擊敗挪威。（周六20，有線61、64、201及203台周日1:00am直播）