墨爾本讓主拿「手」戲

墨爾本讓主拿「手」戲
 
正所謂寧買當頭起，今日晏晝嘅澳職獨腳戲．由聯賽二哥墨爾本勝利主場迎戰中岸水手，識揀梗係要主隊啦，事關佢哋近3戰不敗兼入咗6球，相反水手就愈踢愈沉，勝利「讓主」開硬啦！（周五1，有線64及203台周五4:40pm直播）

計盤路，其實墨爾本勝利連贏咗兩個盤架喇，包括以3:0大炒西悉尼流浪者，同埋喺受讓情況下賽和阿德萊德聯2:2，無獨有偶兩場都係作客，所以今日下午返去主場出擊，勝算當然更高啦，何況好似賓卡法拿等主力呢排腳風順，捧場客唔使擔心。

客軍分心亞冠難兼顧

中岸水手嘅情況就冇咁樂觀喇，佢哋喺3月份只係取得1勝1和1負，唯一勝仗係月頭喺主場小勝墨爾本城1:0，另外不敵阿德萊德聯1:2，同埋1:1賽和柏斯光輝，好耐未試過喺一場比賽內入到1球以上，進攻力薄弱係其中一項隱憂。
歷史同時話俾我哋知道，但凡有份踢亞冠嘅澳職球隊，同一屆必定喺本土賽事冇啖好食，西悉尼流浪者已經係例子，所以今屆有份參戰亞冠嘅中岸水手，預期都會被頻密賽程拖垮，仲諗咁多做乜吖，今仗買墨爾本勝利開「讓主」啦！