英格蘭讓主「立」竿見影

英格蘭讓主「立」竿見影

等咗幾日，今晚終於有幾場似樣啲波上演，歐洲國家盃外圍賽，英格蘭將會喺溫布萊球場遇上立陶宛，三獅兵團四戰全勝，出線機會高唱入雲，不過主場遇弱旅又冇放水理由，而且鑑於多位前鋒有傷下，第一次入選嘅哈利卡尼極可能正選出戰，鬥志唔需要懷疑，信英軍可大勝全取3分。（周五4，有線61及201台周六3:45am直播）

成日都有人討論邊隊係最強英軍，其實我哋香港人對英軍有情意結都好正常，不過又唔好太盲目覺得英軍係咩世界強隊，呢支英格蘭國家隊上屆世盃分組賽已出局，攻守毫無章法，領隊鶴臣只係九流教練，根本冇值得憧憬之處。
而今次呢隊代表隊中，防線一樣由積基爾卡同加利卡希爾擔大旗，兩人今季喺球會表現差劣有目共睹，新世代嘅菲爾鍾斯等足球智慧亦非常低，英軍防線繼續只有歐洲二流級數，就算俾佢哋殺入下屆決賽周，睇怕都唔會走得遠。

哈利卡尼擔正誓爭表現

不過波都係要逐場計，由於今屆歐國盃決賽周名額大增，強隊分布非常平均，英格蘭喺E組點都係一枝獨秀，所以4戰以嚟贏晒只失1球絕對不足為奇，而立陶宛向來足球發展都係一般，英軍要喺主場贏波絕對冇難度，而事實上，今時今日呢隊英軍進攻能力肯定比防守更加可靠，中場有卡域克同佐敦軒達臣，兩人今季都以表現證明自己級數，而前線朗尼喺掌握節奏上向來有一手，今場極可能墜後派牌，讓出箭頭位置予擔正嘅新星哈利卡尼，相信佢一定會大打爭氣波。雖然呢班人打唔出一啲華麗攻勢，但勝在整體反搶能力高。立陶宛中後場一猜失好容易俾呢班英軍有機可乘，唔寄望英格蘭有能力似德國、西班牙等大勝6、7球，但贏3至4粒都仍然喺三獅軍團能力之內。