哥連泰斯讓主「保」本

哥連泰斯讓主「保」本

巴甲勁旅去到省聯比賽仲有冇心機的確係一大疑問，不過大家唔使擔心哥連泰斯會係其中一隊留力份子，一嚟佢哋喺主場出擊，二嚟點都要派吓邊緣球員備戰自由盃，換言之未可以度假住呀。（周四2，香港時間周五6:30am開賽）
如果哥連泰斯冇盃賽纏身，咁嚟到巴省聯的確可以放軟手腳，甚至過份到11個位派晒年青球員落場都冇人會怪佢哋，不過今次對住彭拿保蘭斯就唔同講法！始終彭拿保蘭斯唔係乜嘢傳統勁旅，喺成班自己友面前唔好話和啦，就算只係「僅僅熟」，贏少幾球都已經好失禮吓！
而最重要嘅就係佢哋仲有自由盃賽事跟尾，目前喺分組3戰手握9分已經同出線冇乜分別，不過唔好睇漏打後仲要喺主場迎戰阿甲嘅聖羅倫素，估計佢哋會趁住呢段時間磨利埋班邊緣球員，而呢班人一有機會落場就唔會放過表演機會，所以擔心哥連泰斯會留力似乎早得滯嘞。