法國入球細東成「西」就

法國入球細東成「西」就 

星期四得一場法國對巴西係似樣啲嘅波開打，當中法國已經步入後列貝利時代，今次大軍都以新兵為主，巴西經過世界盃慘敗後都要重新定位，但仍然冇前鋒用連羅賓奴都有得入選，呢場大家攻力弱兼班球星就住踢，入球數應該相當有限。（周四1，香港時間周五4:00am開賽）

呢場係98年世界盃決賽翻版戰，由於當年決賽實在惹起太多爭議，所以今時今日呢個對碰仍然味道十足。不過當年決賽至今已有17年時間，當時嘅兩軍球員迪甘斯及鄧加分別為兩國教頭，呢次重聚又係別有意義。
不過今次雙方大軍名單中，都有啲今時不及往日嘅感覺，先講法國，喺列貝利宣布退役之後，的確有啲蜀中無大將感覺，不過呢支新生代法國又唔可以太過睇小，因為現時歐洲十大炙手可熱嘅新星中，有過半都已經出現喺呢隊國家隊上，一對前U21國腳蘇馬及華拉尼先後打出名堂，基沙文今季一人揹起馬體會，古拿禾傑喺禾堡舉足輕重，前線拿卡錫迪今季正係里昂排榜首最大功臣，加埋有傷在身冇入選嘅普巴，法國嚟緊幾個大賽的確非常令人憧憬。不過咁好人腳都要時間俾佢哋成熟，近戰見法國入球率都係偏低，迪甘斯都要時間再調整球隊，以應付下年自家地頭舉辦嘅歐國盃。
 
巴西頹勢重召羅賓奴

巴西上年世界盃被德國狂炒7:1，對巴西成隊波，甚至整個國家足球嘅自信的確有沉重打擊，世盃過後巴西換上鄧加執教，鄧加教波向來以穩為先，近6場友賽都全勝，似乎球隊都已經重拾信心，準備嚟緊夏天嘅南美國家盃賽事。不過巴西經過上一個大賽，有幾個核心問題都未能解決，當中前鋒位置缺人，堂堂足球王國出現呢個現象的確有啲估唔到，今次友賽竟然要重召羅賓奴出山，一對薩克達箭頭雖然有獲徵召，但歐聯見佢哋根本未到一線級數，巴西要入波又係靠晒尼馬，而中場方面又係識守嘅多過識攻，古天奴會係今場其中一個亮點，但亦要時間同隊友夾默契，總括而言兩軍本來攻力已偏弱，今場試陣意味亦濃，隨時0:0悶和都唔出奇。