巴塞讓主「城」竹在胸

巴塞讓主「城」竹在胸

呢個星期肯定係巴塞全季最重要嘅一個星期！歐聯16強次回合賽事，巴塞隆拿主場再遇曼城，上季同一個對碰巴塞兩回合4:1踢曼城出局，而今次首回合巴塞以2:1擊敗對手，似乎都出線在望。不過呢一戰賽果上可能同去季有啲分別，因為巴塞近期氣勢實在太強，曼城又正值內訌，呢場波巴塞隨時大炒對手振士氣，以應付周末國家打吡，睇吓柏歷堅尼係咪帶埋呢場執包袱走人先！（周三15，有線61、64、201、203台周四3:45am直播）

曼城首回合落後1:2，本來並唔係一個追唔番嘅比數，只係曼城近期實在太多問題，先有隊長高柏尼無故被貶後備，又傳出同費蘭甸奴講手，早前對李斯特城贏得辛苦唔在講，又見大衛施華同阿古路有言語上衝撞，去到啱啱一周英超對般尼，曼城唞足10日竟然打落冇晒隊形以0:1落敗，比賽去到70幾分鐘，柏歷堅尼落後下被迫換走耶耶托尼及大衛施華，明顯見到陣內氣氛有問題，咁嘅士氣走去作客魯營，同自殺冇分別。
曼城呢一場會作出少許變動，首先拿斯尼會復出，但唔見得對整體發揮有太大幫助，而防線上據報會用上文加拉代替迪米捷利斯，呢位法國小將有迪西里嘅身型，可惜只有梅迪薩卡嘅轉身速度，美斯見迪米捷利斯係自己友都可能留兩分薄面，呢次主場出戰必定玩到你無地自容。

「MSN」組合近況大勇

巴塞呢一周接連對曼城及皇馬，兩場賽事直接影響佢哋今季三冠王機會，不過曼城呢位對手巴塞應該唔放在眼內，而且今場巴塞排出嘅陣容，可能係現時最有效率嘅一個，因為咁啱布斯基斯受傷，呢場馬斯查蘭奴終於可以打番防中位置，中場配上沙維或恩尼斯達都好，曼城都應該係波都掂唔到，前線齊晒大勇嘅美斯、蘇亞雷斯同尼馬「MSN」組合，邊個入波由佢哋話晒事，一隊勢強一隊內訌，點有可能一兩球上落咁少，睇好巴塞大炒曼城晉級。