阿仙奴客勝高奏凱「哥」

阿仙奴客勝高奏凱「哥」 

究竟係絕地大反擊，定係歷史重演！今晚嘅歐聯16強次回合大戰可能係阿仙奴全季最重要嘅一場賽事。兵工廠首回合意外慘敗1:3，歐聯史上從未有一隊波首回合主場落後兩球可以出線，但畢竟阿仙奴實力肯定喺摩納哥之上，過去幾年嘅次回合都有出色表現，呢場可以預期阿仙奴打番出水準，而摩納哥因應優勢都肯定會死守，呢場阿仙奴圍攻下要贏番場唔難，出唔出到線就真係睇天意。（周二11，有絿61、64、201、203台周三3:45am直播）

阿仙奴踏入下半季個勢其實好勁，連埋早幾日擊敗韋斯咸，球隊喺本土賽事已經7連勝，而且近月作客分別擊敗曼市雙雄，連以往作客強隊必輸嘅毛病都逐漸解決，似乎阿仙奴真係喺進步當中。而喺聯賽方面，佢哋追到僅落後曼城1分，基於車仔呢一周都只係和波，摩連奴都難得咁講阿仙奴已重返爭標之列，雖然摩帥咁講都只係同自己減壓，但阿仙奴近況絕佳係不爭事實。

近月兩訪曼市報捷

明明狀態咁好，咁上場究竟點輸？一來係基奧特錯失5個黃金機會，二來就係防線出問題，加上摩納哥教練查甸用咗一班米九大隻佬扼守中場掃蕩，阿仙奴大部份球員輸身型打得非常吃力。而經上一場教訓後，就算雲格幾固執，都一定會有所對策，今場人選上變動唔大，至少改打側擊避開對方密密麻麻中場先係上策，當中禾確特及阿歷士山齊士等可以勝任翼鋒位置，中路基奧特畢竟都係法甲神射手，返到老家點都攞番個彩。
摩納哥教練查甸係一個非常有部署嘅教頭，因應兩球優勢，呢場摩納哥一定會主守，而事實上，摩納哥係全法甲失球最少球隊，以守代攻已係平常打法，加上今場有多名主力復出，包括首回合後備上陣嘅恩歷克卡拉斯高以及老將杜拿蘭等，道理上整體能力更勝首回合，不過久守必失加上領先壓力，阿仙奴肯定有機可乘，仲記得阿仙奴上兩屆次回合作客拜仁，分別取得1勝1和，今次只係摩納哥啫，放開嚟打嘅肯定又可以打場好波。