紅軍上盤風捲殘「雲」

紅軍上盤風捲殘「雲」 

硬淨程度不減嘅利物浦，今晚英超會作客威爾斯，同史雲斯爭奪寶貴3分，雖然紅軍有唔少傷兵，但係佢哋嘅板凳深度充足，加上狀態有保證，讓半球、一球難度唔大，上盤起碼坐收半格。（周一18，now621台周二4:00am直播）

史雲斯早前連勝曼聯同埋般尼，好可惜上輪英超作客白鹿徑不敵熱刺2:3，打擊咗全隊士氣，而且前鋒巴菲迪比高美斯踢踢下暈咗，差啲重演當年科爾嘅悲劇，好在最後吉人天相，但呢位法國球員就要返祖家治療，暫時未有進一步嘅消息公佈，不過就算佢好番再跟埋操，相信領隊蒙克都唔希望做「殺人兇手」，今仗唔使預巴菲迪比高美斯，加上韋菲特邦尼已轉投曼城，換言之史雲斯鋒線選擇唔多，無奈另一射手安尼斯嘅入球量又差強人意，真係擔心白天鵝唔夠攻力。
利物浦嘅傷兵其實都算多，馬馬度沙高、祖阿倫同埋史卡迪爾雖然已康復，但係距離復出嘅時間似乎言之尚早，如果今日其中一個人可以出現喺後備名單當中，已經屬意外驚喜，而法拿根、巴利鍾斯、盧卡斯、荷西安歷基同埋佐敦伊比亦肯定倦勤。

紅軍板凳深度充足

好在紅軍板凳深度尚算充足，起碼前鋒已經有史杜列治、史達寧、巴洛迪利、波連尼同埋列基林拔任由領隊羅渣士選擇，而且狀態大勇嘅拉爾拉拿、佐敦軒達臣同埋菲臘比古天奴又冇傷冇病，安利簡恩打後衛亦廣受讚賞，加上神奇隊長謝拉特已準備好復出，所以近22場比賽僅嘗一敗嘅利物浦，真係萬事俱備，是役讓半球、一球捧上盤食天鵝肉。