車路士主場大豐「修」

車路士主場大豐「修」 
 
英超打到第29周，車路士周中俾聖日耳門意外踢出局，變相得番一個聯賽冠軍要爭，而摩連奴都希望盡早鎖定冠軍等阿巴莫域條氣順啲，呢場冇可能會放過修咸頓。（周日22，now621台周日9:30pm直播）

修咸頓下半季雖然未有嚴重走樣，但整體球員質素的確唔及其他幾支爭前四球隊，所以當阿仙奴、熱刺等慢慢上力，佢哋都跌到第7位。事實上，修咸頓下半季最大問題係來自進攻，上半季首席射手柏利自聖誕以嚟聯賽未曾取得入球，近期入波靠晒沙迪奧文尼，但除咗呢位翼鋒，近4戰球隊未有其他球員有進帳，呢場波對手係車仔，似乎更難取得入球。

摩連奴望大勝振士氣

車路士周中輸作客入球歐聯出局，摩連奴都覺得冇面，通常呢啲時間佢會立即啟動一場大勝振士氣，所以唔好以為車仔打咗場120分鐘會有所保留；而周中又要為輸波負上一定責任嘅加利卡希爾，睇怕自此後會被葛特蘇馬搶走正選，有傳華拉尼極可能夏天加盟，下季車仔防線應該穩陣好多。車仔今仗前線齊人，新影帝奧斯卡周中只踢45分鐘，摩連奴都應該會排出一個相對進攻啲嘅陣，贏兩球開埋「讓主」冇問題。