曼聯熱刺「大」無畏

曼聯熱刺「大」無畏 

英超周日晚又有前四搶奪大戰，曼聯啱啱喺足總盃出埋局，今季雲高爾注定四大皆空，雖然可專注守住前四，但連周今場對熱刺在內，球隊嚟緊六周賽事惡戰連場，但曼聯狀態未見改善之餘，前線亦續有尹佩斯養傷，熱刺同樣餘下聯賽可爭，呢場波一定好鬥志，睇哈利卡尼狀態「Fit」到非曼聯守得住，雙方呢場好有可能出現大量入球，觀眾可買定花生等睇入球騷。（周日35，now621台周一12:00am直播）

熱刺經過英聯盃失利後迅速兩連勝，當中上場擊敗昆流一戰，哈利卡尼個人又連取兩個入球，目前喺射手榜已追上阿古路及迪亞高哥斯達，以佢開季頭兩個月未有正選嚟計，入球數字的確高得驚人，而佢亦連續兩個月成為最佳球員，以往就只有C朗、科拿及柏金試過，能夠同呢啲大名氣球員相提並論，都足證哈利卡尼能力得到充分證明。睇翻熱刺過去十年，僅得一次殺入歐聯，就係靠加里夫巴利單天保至尊取得第四席位，而哈利卡尼似乎都有力成為熱刺另一個經典。

熱刺難望保持不失

熱刺上唔上到第四，前面都仍然有多重難關，至少今晚對住競爭對手曼聯，就一定唔可以送3分俾對手，不過熱刺今場作客之餘，其實都遇上一定麻煩，事關曼聯冇嘢叻，但進攻上佢哋依賴高空轟炸，熱刺一對正選中堅法斯奧及維頓漢處理傳中波時有出錯，雖然曼聯亦冇本事球球斬入嚟都入，但至少熱刺呢場都好難保持唔失波。

鬥熱刺兩年半不勝

雙方都唔係擅守嘅球隊，而且為免被利物浦及阿仙奴走甩，都肯定積極求搶3分，之但係預期雙方都有入球下，呢場波又的確勝負難料，而曼聯今場既有迪馬利亞停賽，又有尹佩斯受傷，愈睇就愈似贏唔到熱刺，最恐怖係曼聯原來已經兩年半未贏過對手，連續兩次主場都輸晒，唔通又嚟「英超曼聯又輸一場」。