般尼主場「曼」無一失

般尼主場「曼」無一失

英超周六尾場有場強弱對決，聯賽排尾二嘅般尼主場迎戰曼城，表面上呢場波曼城係贏硬，但亦要留意般尼近9場主場比賽其實僅3敗，而輸波都只係輸1球咁大把，加埋佢哋主場細細其他球隊肯定打唔慣，某程度上入球率亦幾高，唔可以睇少；相對曼城對上4次作客僅1勝，呢場波曼城隨時再滑鐵盧，與其冒險博客隊贏2球以上贏盤，不如信般尼不敗開「讓主」似乎更加容易。（周六61，now621台周日1:30am直播）

般尼近期雖然輸波多，但呢支弱旅同昆士柏流浪及李斯特城有啲唔同，佢哋明知自己同其他英超隊級數有別，所以場場放開嚟打，而且打法上非常硬淨，壓迫力更十足，早前迫和車路士見艾殊利班尼斯等打法就明，而佢哋喺眾多弱隊中又唔算唔識攻，尤其主場出戰，今季其實只得3場冇波入，都唔知好過一啲中游隊幾多，呢場對住防守不穩嘅曼城，都唔好話一定輸硬。

曼城陣內士氣一般

曼城今場算齊腳，不過全隊最穩嘅隊長高柏尼，早前無端端被雪藏，有傳佢同費蘭甸奴打交所以被罰，雖然領隊柏歷堅尼講過冇咩事，但連同上場贏李斯特城時，見阿古路及大衛施華時有互相指罵場面，球隊氣氛肯定麻麻哋，要留意佢哋嚟緊周中仍有對巴塞歐聯大戰，呢場柏歷堅尼見打弱隊排陣上肯定有所保留，呢場隨時玩出事。