阿仙奴雄才「韋」略

阿仙奴雄才「韋」略

英超今晚戰火重開，車路士周中歐聯出局下，睇嚟聯賽冠軍都好難再有變數，不過前四位置嘅其餘三個席位仍然有待確定，當中阿仙奴近6場本土賽事全勝，5日前更作客擊敗曼聯，士氣肯定大振，當然佢哋嚟緊周中都有歐聯大戰跟尾，但首回合落後1:3晉級機會太微，呢場全取3分更加重要，韋斯咸風流波已經7場不勝，似乎唔會壞兵工廠好事。（周六24，now621台周六11:00pm直播）

韋斯咸球迷季初真係好似發夢一樣，球隊一度殺到上第四位，唔通下季有得踢歐洲賽咁威水？不過要知道帶隊嘅始終係「Big Sam」艾拿戴斯，呢位領隊一向不求有功但求無過，所帶球隊往往一攞夠分後，表現就會立即180度走樣，對上6場英超「槌仔幫」只取得3分咁大把，但現時佢哋有39分在手，道理上已冇降班威脅，而球隊距離第7名嘅修咸頓已有10分差距，根本上已經冇可能追得番，有理由相信喺餘下10周賽事，韋斯咸班球員已可以準備定提早放暑假。

兵工廠國內六連勝

相比起韋斯咸，阿仙奴真係場場都有嘢爭，前一周不敵摩納哥，係球隊近期少有一場走樣比賽，唔計呢場歐聯賽事，兵工廠其實喺國內已6連勝，當中作客擊敗曼聯已經證明球隊狀態絕佳，所以呢一戰主場對韋斯咸球隊必有十足把握爭勝。

雲格中場球員選擇多

事實上，阿仙奴今場除一班長期傷兵外，新增傷員只有阿歷士張伯倫，但中場人材過盛嘅阿仙奴，仍然有辛迪卡索拉、奧斯爾、艾朗藍斯、路斯基以及高基連可用，都仲未計復出嘅韋舒亞同禾確特，衰啲講真係少一個唔嫌少；再講阿仙奴喺歐聯落後太多，下周中都係盡吓人事，根本就冇必要喺聯賽留力；睇埋賽績，主隊已連續4次主場擊敗對手，對上兩屆都攻入3球以上，睇嚟一場大捷在所難免。