利華半和「特」別介紹

利華半和「特」別介紹 
 
強如拜仁同埋多蒙特喺歐聯16強首回合賽事都贏唔到波，係得利華古遜擊敗馬體會幫德甲爭一口氣；既然佢哋能夠喺歐聯首回合領先對手，次回合會繼續去馬，只怕會影響到今輪德甲。（周五26，有線61及201台周六3:30am直播）

回顧番歐聯16強首回合賽事，大熱門拜仁只係同薩克達踢成平手，而多蒙特甚至不敵祖雲達斯，點知牌面處於下風嘅利華就喺主場擊敗上季西甲冠軍馬體會，總算為德甲出一分力，而佢哋千辛萬苦能夠領先到首回合，唔留力應付埋下個周中舉行嘅次回合賽事就絕對講唔通嘞，始終盃賽就淨番一場，而德甲就仲有漫漫長路，換轉你係主帥都知道下場歐聯先係生死大戰，恐怕今晚真係未必會盡晒所有正選落場。
尤其係上場利華雖然作客贏到柏達邦，就咁睇個比數好似好壓倒性咁，但係有睇直播就一定唔會認同！其實當晚利華絕對係冇啖好食，事關柏達邦全晚守得幾好，只係去到80分鐘打後唔夠體力，喺呢個時候先至由柏柏杜普路斯同埋孫興民偷襲得手，嚴格嚟講贏得相當驚險。

史特加必踢守勢波

對住柏達邦已經用盡所有體力咁滯，而且又要留力踢周中歐聯，有咁多不利因素喺身嘅利華想喺主場贏到史特加恐怕唔係咁易！問題係目前排喺榜尾嘅史特加上次贏波已經要數到去上年12月中作客擊敗漢堡咁耐嘞，捧客勝就等於追盲門，呢場德甲捧主客和求奇一瓣都有一定風險！不過唔揀主客和都仲有大把選擇，既然利華未必有足夠體力，加上又未必會用到最強人腳，而史特加作客唔使問都知會踢守勢波，左計右計似乎頭45分鐘握手言和嘅機會最大。