禾夫斯堡上盤得「米」

禾夫斯堡上盤得「米」
 
歐霸盃16強首回合賽事，近況大勇的德甲新貴禾夫斯堡喺主場迎戰日落西山嘅國際米蘭，贏波係意料之內，問題只係數幾多球。足智彩有讓球盤提供，梗係要捧禾夫斯堡讓半球、一球買上盤得「米」。（周四5，有線61、64、201及203台周五2:00am直播）

禾夫斯堡近況極好，早前連勝賀芬咸、利華古遜、士砵亭同埋哈化柏林等對手，德國盃又淘汰RB萊比錫晉級，雖然上周聯賽負奧格斯堡0:1，但係佢哋明顯有留力之嫌，為咗呢場歐霸盃16強賽事，禾夫斯堡忍痛跌3分，意圖都相當明顯啦！

巴斯杜斯士哥停不了

事實上，呢支德國新興勢力，喺巨額收購咗舒賀爾尼呢啲星級球員之後，全隊波即時升呢，鑑於德甲一早俾拜仁慕尼黑彈出，所以盃賽更成為禾夫斯堡嘅主力戰場，咪忘記佢哋嘅射手巴斯杜斯呢排腳風超順，幾乎場場波都有士哥，今晚由佢夥拍卡利古尼同埋麥斯美艾洛特等中前場好手攻堅，肯定大把波入。
國際米蘭早前亦曾保持5場不敗，包括擊敗巴勒莫、阿特蘭大、卡利亞里，同埋上一圈歐霸淘汰蘇格蘭傳統勁旅些路迪，無奈近兩周勢頭又再轉弱，對住實力份子費倫天拿同埋拿玻里只係取得1和1負，睇嚟已經打回原形。
其實藍黑兵團今季演出依然令人失望，早排射手莫路伊卡迪將件波衫送俾球迷，更被粉絲丟返落球場拒絕接受，可想而知內部士氣都係麻麻。更何況另一射手柏拉斯奧已無復當年勇，中場古亞連喺屢傳會離隊之下，表現更反覆無常，國米今仗想阻禾堡開半、一上盤都難。