阿聯讓主「手」到拿來

阿聯讓主「手」到拿來
 
唔係話唔畀機會，不過中岸水手由開季至今有成幾個月咁耐都未試過作客贏波，真係諗唔到任何理由再撐佢哋，總之見到呢隊波一係就當睇唔到，一係就直情轉吼對家阿聯贏埋就算嘞。（周四1，有線64及203台周四4:30pm直播）

若果唔計季初舉行嘅澳足盃，淨係計澳職賽事嘅話，今季中岸水手作客連贏都未贏過，和波保到不敗已經要偷笑咁滯，一隊完全唔識作客嘅球隊點捧得落手呀？當然贏唔到波都未必輸硬，問題係主隊阿德萊德聯今季喺主場嘅成績非常唔錯，呢吓先至攞命呢！
睇番阿聯近期嘅成績好似平平無奇，先後不敵墨爾本城同埋威靈頓鳳凰，不過呢兩場敗仗都係喺客場取得，睇番佢哋嘅主場成績就真係要另眼相看；千祈唔好因為踢過10輪澳職只係贏過5次就走漏眼呀，實際上佢哋入18球、失咗8球，呢個得失球差仲好過榜首珀斯光輝，睇嚟佢哋係正宗淨係識得喺主場搵食嘅地頭龍，只係因為作客唔得先至搞到排喺中游。
難得阿德萊德聯今日淨係得奧沙麥馬歷同埋佐敦艾斯未必出得，幾乎「夫添」直情要埋讓主都得。