布力般「保」證開主勝

布力般「保」證開主勝 
 
布力般流浪應該立即改名做「暴力般流浪」，剛剛佢哋就喺英足盃示範咗點用功夫嚟到阻止利物浦全場嘅攻勢，返到嚟英冠對番同級對手更加如魚得水啦，照計應該唔會怕傷兵滿營嘅保頓嘅！（周三4，香港時間周四3:45am開賽）

就喺剛剛過去嘅周中布力般流浪曾經作客去到利物浦，賽前唔少人都認定佢哋九死一生，點知全程球證都睇唔到佢哋大踢功夫足球，仲要去到比賽尾段先至有中場卡亞尼攞番張黃牌咁大把。若果你係利物浦嘅球迷當然會睇到眼火爆啦，不過普通球迷見到佢哋能夠睇得死史杜列治、史達寧，同埋菲臘比古天奴組成嘅進攻組合，都要甘拜下風認同佢哋嘅防守做得唔錯。

客軍傷兵近10人

撞正今晚作客嘅保頓陣中有一大批傷兵仲未出得，淨係數傷兵球員嘅人數已經有接近10個咁多，換言之今晚點砌都砌唔到個最佳陣容出嚟。偏偏布力般流浪就冇乜傷停問題，僅得中場大腦鄧尼同埋後衛沙恩杜菲唔出得嘅影響較大，其餘位置可以沿用番上仗硬撼利物浦嘅原班人馬，有埋主場幫手就更加難喺主場失波，唔望佢哋大勝，不過要開出主勝應該冇乜問題。