西流平盤「本」小利大

西流平盤「本」小利大 

假假哋西悉尼流浪者都係上屆亞冠盃嘅盟主，間唔中喺澳職失分都可以理解，不過去到今時今日都仲係毫無改善，真係好難唔懷疑佢哋淨係識得揀波踢，要捉中呢隊「海鮮波」真係唔係咁易！（周三1，香港時間周三4:30pm開賽）

門將高域復任正選

能夠喺亞冠作客都贏到日職勁旅鹿島鹿角，仲以為西悉尼流浪者喺下半季會生生性性啦，點知打後又係毫無表現，近期對住FC悉尼、FC廣州，同埋布里斯班獅吼直情全數輸晒，捧佢哋反底贏波真係傾家蕩產都未見到任何曙光呀！
一次就話意外啫，不過連場係咁就真係冇理由再撐佢哋，但係今次應該會係例外嘞，事關有傳門將高域可能會復任正選，睇番佢哋由上月開始踢過8場賽事，當中7場比賽都有失波，能夠出番個正選門將，唔多唔少都會減低番個失球數字；另外，亦唔好睇漏西悉尼流浪者雖然連場失分，但係講到入波佢哋依然係交足功課，對住鹿島鹿角入到3球，面對住FC廣州亦有2球喺手，仲識入波今次喺自己地頭迎戰唔識入波嘅墨爾本城應該點都有球波喺手，咁都只係開出個平手盤，係咪應該畀多次機會佢哋先？