車路士上盤「聖」券在握

車路士上盤「聖」券在握 
    
歐聯16強次回合賽事，車路士喺主場出擊兼以逸待勞，擊敗巴黎聖日耳門晉級絕對係意料之內，問題只係贏幾多球，更何況客軍形勢上要焗攻，有利於車仔發揮，半球、一球上盤要跟進。（周三3，有線61、64、201及203台周四3:45am直播）

車路士早前喺英格蘭足總盃意外不敵巴拉福特出局，包括巴黎聖日耳門教練白蘭斯在內，都認為摩連奴根本係有心輸波，呢個陰謀論絕對可以成立，因為藍戰士喺首回合作客巴黎前冇賽事，最後如願踢成1:1保住不敗身，兼有一個作客入球在手。而喺今場次回合之前，車路士又因為唔使踢足總盃而多咗時間休息，真係超筍！

上周末停戰以逸待勞

尼曼查馬迪較早前同隊友慶祝捧聯賽盃時整親，外電有傳佢可能趕唔切復出，但亦隨時係煙幕，只係藍戰士傷兵唔算多，肯定唔踢得嘅只有約翰米基爾一人，以車仔嘅豪華班底嚟講，根本唔係咩大問題。何況迪亞高哥斯達、夏薩特、奧斯卡杜斯山度士、法比加斯，仲有愈老愈好波嘅泰利都可全部列陣，主場出擊勝望濃。
巴黎聖日耳門嘅顧慮比較多，首先佢哋喺法甲只係排第2，上周輕取朗斯4:1之後，依然要屈居里昂之下，其次係盧卡斯洛迪古斯同埋奧里亞因傷冇隨軍，多少都影響球隊兵源調動，而前紐卡素中場卡比耶就啱啱復出，體能同狀態未操起，馬高華拉堤同埋雲達韋爾兩位主力再領黃牌就要喺下一圈停賽，心態上一定有保留。
大衛雷斯今仗會倒戈，伊巴謙莫域就會夥拍卡雲尼，重遇佢生平最敬重嘅領隊摩連奴，是役真係好多焦點，不過最重要都係捧車路士開出半球、一球嘅上盤，因為有錢落袋先至最實際。