皇馬讓和聲勢「浩」蕩

皇馬讓和聲勢「浩」蕩

對於皇馬球迷嚟講，巴塞上榜首呢句說話，可能真係難聽過粗口。現時皇馬喺聯賽冇優勢，加上西班牙盃出局下歐聯不容再失。還好球隊喺呢個困難時間，撞正上季16強兩回合大敗2:9嘅史浩克04。首回合皇馬小勝2:0已有兩個作客入球優惠，以皇馬現時狀態捧佢淨勝2球開「讓和」。（周二2，有線61、64、201、203台周三3:45am直播）

史浩克04上季喺歐聯對住皇馬，兩回合以大比數2:9落敗，但留意當時04防線千瘡百孔，主場大敗於皇馬後再大比數不敵拜仁。但之後直到今季，就算04輸再多都好，都未曾以3球以上比數輸波，某程度上都可以見到，前歐聯冠軍教頭迪馬堤奧上任後，史浩克04表現係非常穩定。
史浩克04首回合冇心同皇馬鬥攻，最後以2球小敗，一方面見04冇期望過擊敗皇馬晉級，二來係保留體力，寧願留力打聯賽好過，所以今場再作客班拿貝，都冇咩人期望佢哋有奇跡出現。之不過，皇馬明知你無心戀戰，又有冇必要認真大炒一場呢？皇馬首回合有兩個作客入球在手，呢場入1至2球拉開比數，道理上已相當安全，以安帥一貫作風，都唔會刻意求大數對手，唔好以為呢場波一定係入球騷。

C朗冇火難取大捷

而事實上，皇馬近期腳風甚差，一連兩場西甲和負各一，聯賽一哥席位不保，C朗自失戀後入球率大減，近期入球全部來自12碼及門前機會，所以如果可以嘅話，安帥呢場波都想用啲新人刺激吓球隊。而皇馬方面一早揚言，呢場會放馬田奧迪加特喺後備，如果呢位16歲小將上陣，將打破歐聯最年青球員上陣紀錄，而莫迪歷呢場波亦肯定在陣，不過狀態唔夠睇怕最多打10多分鐘，不過正因為以上原因，皇馬呢場波點都唔會有正常陣容同狀態，睇怕同上一回合一樣，都係淨勝2球左右機會大。