皇馬大勝好餐“史”

皇馬大勝好餐“史”

皇馬在西甲意外地輸畀畢爾包，榜首位置被死敵巴塞搶走，球隊上下肯定滿肚怨氣，明晨歐冠盃十六強次回合，再遇德甲史浩克○四，誓必盡情發洩在對手身上。

首回合落後兩球，史浩克今戰只有搏一搏，單車變摩托，但講真一句，論實力，好明顯完全唔係皇馬對手，仲要作客貝拿堡球場，如果要同“銀河艦隊”駁拳的話，睇怕部單車連渣都冇，初盤皇家馬德里硬讓兩球，呢一年來皇馬曾經三勝史浩克，總比數十一比二，今場至少三球係最低消費。

皇馬因受到傷兵影響下，不但近兩場聯賽接連失分，而整體發揮亦有下降跡象，球隊的確需要作出調整，幸好賽前有利好消息，防守大將拉莫斯與中場核心摩特歷經已傷癒，今仗隨時候命，絕對可以令BBC組合重現殺氣。

史浩克陣中傷兵亦唔少，包括兩位正、副門將，仲有基治荷夫、達斯拿、化芬及奧巴斯，前中後三線都大大削弱，加上德甲十一場作客只係三勝一和七負劣績，今場應該凶多吉少。

推介：皇家馬德里4:0