紅魔鬼「仙」聲奪人

紅魔鬼「仙」聲奪人

英格蘭足總盃8強賽事，周一最後一戰先迎嚟戲碼最強大戰。曼聯近期場場贏得負碌，不過有運都係足球嘅一部分，而阿仙奴近8戰6勝，但輸兩場都係對強隊，雲格遇強即屈缺點仍然冇改善，對上6次曼聯主場出戰兵工廠贏晒，睇嚟都好難有例外。（周一11，now621台周二3:45am直播）

從賽績睇，阿仙奴近況都唔知叫好定唔好，佢哋近12場贏10場，當中贏過曼城，季尾前四模式一開果然唔簡單。不過佢哋聯賽發揮穩定，打到盃賽又固態復萌，主場對摩納哥大敗1:3，前線基奧特屢失良機，防線梅迪薩卡好似40歲慢過隻龜，其實對上12場輸嘅兩場，就係輸俾熱刺同摩納哥，連同季內不敵曼聯、車路士同多蒙特，今季除咗贏過曼城之外對強隊無一倖免，呢場作客奧脫福又九死一生。

費蘭尼頭槌有威脅

當然咁嘅往績，雲格自己都心知肚明，而教授近期都改變戰術，由以往打控球在腳改為防反快速突襲，成績上係有好轉，但今場如果作客任由曼聯圍攻，就算曼聯入球扳斧有限，但兵工廠要對付費蘭尼頭槌都已經頭痛，阿仙奴一定信唔過。

阿仙奴忌高空攻勢

曼聯有伊雲斯被罰停賽6場，前線亦有尹佩斯受傷，話曼聯有十足取勝把握又講唔上，不過紅魔近排打落冇咩戰術可言，個波去到兩路就斬入去，但阿仙奴最怕嘅就係呢啲高波，而且就算曼聯近期幾殘陣都好，前一場佢哋作客新特蘭，有兩個前曼聯守將合力拉跌法卡奧博得12碼，上一場就有告魯爾解圍失誤，對上兩場全取6分運氣佔九成，正所謂運氣話嚟就嚟，呢場曼聯同阿仙奴可能各有缺點，但主場之利加有運，差距足夠做成一球上落。