馬體會主勝無與「倫」比

馬體會主勝無與「倫」比

西甲今晚上演前四大戰；衛冕冠軍馬體會近戰連連失分，目前連第三位置都受到華倫西亞威脅，現時華倫只比馬體會少1分，今場兩隊正面交鋒唔止6分波咁簡單。不過今季馬體會主場畢竟都只係輸過兩場，華倫班兵又太後生不擅處理壓力，睇好落後榜首皇馬7分嘅馬體會為保爭標機會，可以喺主場贏波。（周日50，now632台周一4:00am直播）

華倫西亞今季咁犀利，都多得球會方面解決晒財政問題，季初有新血加盟之餘，隊中青訓又接到軌，當中荷西加耶等唔在講，仲有現役西班牙國腳柏高艾卡沙等，華倫的確有一個好強嘅陣容。不過我哋都再三講過，後生係有活力，但打落隊波唔識收，往往應該放慢節奏時又唔識慢，好似前一場作客科爾多瓦咁，幾經艱苦先至喺尾段領先，但全隊仍然壓晒上去同對方快打快，科爾多瓦尾段有機會追唔和只係華倫夠運，但今場對嘅係馬體會，咁打法真係多多唔夠輸。
首循環馬體會作客輸1:3，好記得嗰場波華倫上半場好快就轟入3球，但成班兵其後唔知攻定守好，俾馬體會反客為主壓番住，好彩上半場只係失1球，半場時間教練稍作調整至保住勝果；而有過一次教訓，今次施蒙尼肯定會打得謹慎，任由華倫去攻打防守反擊，又往者用殺着死球戰術等，肯定唔會再犯上次錯誤。

周中休戰冇後顧之憂

而事實上，馬體會今場都冇咩贏唔到嘅理由，佢哋嚟緊周中冇波打，已經冇後顧之憂，而陣容上加比、基沙文、文迪蘇傑都在陣，攻守能力有保證。當然華倫今場都齊腳，但要留意馬體會除咗要搶分，仲要追番首循環個對賽成績，肯定唔會入三兩球收手，信主隊有決心贏兩三球以上。