美斯謙：維拉防線穿窿明益西布朗

日前先喺聯賽交手嘅阿士東維拉同西布朗，今晚再喺維拉公園踢足總盃8強戰。西布朗上仗輸波全因門將賓科士打補時階段犯錯輸12碼，一班球員自然希望喺呢場「中部打吡」贏波雪恥，加上維拉上場贏得冇乜說服力，今場後衞阿里施蘇高同辛德路斯都因傷缺陣外，右後衞侯頓亦因累積滿黃牌要停賽，加上另一中堅華亞爾未知能否能及上陣，條防線簡直係天殘地缺，阿謙就唔多睇好佢哋可以再下一城嘞！

（now 621及633台周日凌晨1時30分直播）

誓報周中聯賽敗辱
西布朗上仗輸波其實非常唔抵，主帥佩尼斯於半場落後一球時並冇換人，只係教路就可以令成班波喺下半場表現脫胎換骨，由此呢位領隊功力係非常深厚。西布朗前鋒比拉希奴近5仗入4球表現出色，佢同另一前線拍檔艾迪耶有力對後防不穩嘅維拉造成威脅，加上對手後防因傷停關係大穿窿阿謙睇好西布朗可以成功報回周中一敗之辱，平手盤一於捧西布朗。