捧畢爾包「里」所當然

捧畢爾包「里」所當然

西甲周六晚由皇馬先行出擊；「銀河艦隊」近戰表現只屬一般，C朗雖然連場有波入，但已經冇晒以往逢人過人嘅速度，近期入波多靠12碼同門前嘅簡單機會，而球隊上季到訪新聖馬美斯球場只能打成平手，下周中亦有歐聯後顧，似乎今場失分機會幾高，畢爾包雖靜待西班牙盃決賽，但聯賽仍要搶分，今場肯定唔會輕易放過皇馬。（周六49，now632台周日1:00am直播）

畢爾包今季整體表現一般，但由於西班牙盃抽好籤，完全避過巴塞、皇馬及馬體會，成功殺入決賽後已確立下季一個歐霸席位，而現時佢哋唯一要做嘅，就係喺聯賽盡快搶夠分上岸，等5月時有充分時間俾一班主力休息，務必以最完整人腳及狀態大戰巴塞。

畢爾包前場人腳齊

過去嘅新聖馬美斯球場威力十足，但今季呢個主場威力似乎唔見咗，球隊近4場賽事只取1勝，不過近兩場連勝伊巴及愛斯賓奴，見佢哋似乎已經復甦；今場畢爾包前線齊人，只有防線嘅米基聖荷西及中場伊度拉斯比唔出得，睇嚟的確有力令皇馬失分。
表面上，皇馬近仗表現唔算太差，但有睇佢哋比賽都見，皇馬中場極缺創造力，而過去幾秒打到人哋禁區嘅反擊速度都冇埋，當中C朗跌Watt最明顯，踏入2015年入球率大減之餘，原來過去10個月，總共51次主射罰球全部唔入，唔怪得早前皇馬有C朗停賽下，感覺反而打得更順，但無可奈何嘅係，現時皇馬戰術仍然係圍繞C朗嚟打，入波唔多都可以講意料中事。

皇馬有歐聯後顧

而事實係，皇馬下周中仍有歐聯戰線，就算據報今場莫迪歷應該可以復出，但大傷初癒睇嚟最多打幾十分鐘當熱身，而有傳16歲小將馬田奧迪加特周中將會代表皇馬出戰，成為歐聯史上出場最年輕球員，如果屬實今場肯定會俾佢落一落場同班主力夾吓先，但無論出莫迪歷定奧迪加特都好，似乎皇馬都唔會突然回復水準。今場皇馬太多問題在身，反而畢爾包毫無包袱，主隊放手一博肯定有爆冷條件。