哈化柏林「特」別推介

哈化柏林「特」別推介
 
首都球會哈化柏林今季持續黑仔本色，喺歇冬返嚟之後就要應付連場硬仗，不過黑到落谷底亦代表打後就會反彈，今晚作客另一隊護級份子史特加話唔定就係谷底「反底」嘅新開始！（周五16，有線61及201台周六3:00am直播）

莫講話護級球隊，就算係好似賀芬咸又或者法蘭克福呢類中游球隊對住雲達不來梅、利華古遜，同埋近期大勇嘅禾夫斯堡都唔敢話自己一定可以全身而退啦，偏偏黑到透嘅哈化柏林就喺歇冬返嚟之後，就要面對住以上旺到飛起嘅球隊；雲達不來梅一口氣由降班漩渦加殺上中游、利華就爭緊歐聯資格，而禾夫斯堡就更加唔使多講，淨係一個巴斯杜斯喺下半季嘅入波已經多過唔少前鋒一季嘅入球量，所以哈化柏林對住以上球隊輸波只係意料中事，根本就冇乜指標性，要睇就睇佢哋對住其他球隊嘅表現好過。
若果唔計以上對住不來梅、利華，同埋禾堡嘅賽事，始終哈化柏林都叫做贏過緬恩斯同埋奧格斯堡，有咁嘅表現都可以收貨，尤其係捧完非國盃歸隊嘅沙洛文卡勞並冇當球季已經完結，喺近期連同另一個拍檔舒希巴都識入波。

史特加近況下滑

反而主隊史特加目前嘅處境就真係令人擔心嘞，歇冬之後6戰淨係和過2場，其餘賽事通通輸晒，而最傷嘅就係喺主場同多蒙特鬥攻輸波，上仗作客漢諾威仲一度領先到去70分鐘，連場咁失分法對士氣肯定會有唔少影響，偏偏首席射手夏歷喺上年11月試過梅開二度之後就一直忘帶射門鞋，對搶分護級又增加咗唔少難度，今晚只係因為主場出擊而成為熱門，似乎唔多抵玩，反而哈化有得受讓隨時會贏出呢場護級大戰。