史特加難有“柏”力

史特加難有“柏”力

    德甲明晨上演一場搶分戰，榜尾嘅史特加迎戰哈化柏林。史特加雖然佔主場之利，可惜今季主場戰績慘不忍睹，除咗一球險勝漢諾威，贏過一場咁大把外，其餘十場係兩和八負，係德甲各隊中最差。真係“黑人黑夜捉烏鴉”，“黑”到冇朋友。

    雖則今場對手哈化柏林亦係作客最差一隊，但最少十一場波搶到八分，差極都冇史特加踢主場咁離譜。初盤史特加仲要讓半球，十一仗主場只得六球進賬，史特加嘅入球能力好有限，試問又點讓得起對手，一於捧哈化柏林至少“加”一分。

    聯賽只剩十一輪比賽，只得十九分嘅史特加已身陷險境，場場波都要非搏不可，但真係能力所限。球隊不但攻力不足，防守同樣脆弱，就算自己地頭亦失廿二球，單睇各項數據，史特加應該叫做“死得啦”。

    哈化柏林距離降班線只有一分之差，同樣要求分自保，肯定唔會放軟手腳。陣中有卡羅奧、隆尼、細貝萌及希丁加等名氣球員，整體質素較為平均，對住歇冬後六場不勝嘅史特加，至少可保不敗。

    推介：哈化柏林1:1