捧修咸頓上盤剪「布」

捧修咸頓上盤剪「布」 

的確「新官上任三把火」，不過西布朗主帥普利斯已經接掌咗球隊近三個月咁耐嘞，乜嘢神秘感都開始消失啦，今晚硬撼修咸頓係時候見真章！（周六18，now622台周六11:00pm直播）

大家都知道普利斯係有料之人，上季仲幫過水晶宮成功護級，所以當知道佢空降西布朗之後難免會有所憧憬，果然由年初上任至今，佢帶領咗西布朗9場賽事只係輸過1場咁大把，不過要小心喺呢段時間入面所面對嘅對手其實唔係咁強，好似喺主場一遇到較為強勁嘅熱刺就立即冇晒還手之力，上仗對住另一隊護級對手新特蘭亦只係和波收場。恐怕呢位新官嘅火已經熄滅得七七八八，遇到實力份子修咸頓將會非常頭痛。

艾達韋列特有望復出

當然修咸頓嘅近況亦唔好得去邊，成功捱過咗「快車賽期」之後就開始現形，喺上個月仲試過不敵史雲斯、賽和韋斯咸，上輪亦不敵利物浦，期間只係入過1球，不過唔好睇漏只係失3球咁少，比利時後衛艾達韋列特可能會趕及復出就令到防線更加完整。而近況平平作客西布朗都仲要讓到平手、半球咁辣就知道足智彩都睇好佢哋可以反底，一於跟風要吼實上盤。