史雲斯平盤明益「尼」

史雲斯平盤明益「尼」 

多謝艾殊利班尼斯一腳「收山腳」搞到般尼成為上個禮拜嘅英超焦點之一，不過正所謂「人怕出名豬怕肥」，今晚佢哋喺主場迎戰史雲斯可能會受到球證嘅「特別招呼」，而變得綁手綁腳喎！（周六14，now623台周六11:00pm直播）

護級份子就係因為技術唔好先至搞到要喺下游掙扎，用埋「超技術」阻止對手都可以理解嘅，問題係佢哋上仗對住車路士實在做得太過明顯，艾殊利班尼斯出到「收山腳」竟然連牌都冇張，而當時球證並冇作出任何處罰，搞到唔少球迷都話球證發雞盲。相信今晚英超賽會將會落定柯打，總之會好似慈母一樣咁保護落場球員，一見到有任何犯規情況就會果斷執法。

上仗挫紅魔士氣盛

相信般尼喺短期內都唔會作出粗野攔截，變相令到佢哋綁手綁腳，加埋有傳中鋒丹尼艾格斯喺季尾就會跳船離隊，呢期成隊波嘅士氣肯定跌落新低點。反而史雲斯上仗憑住奇誠庸同埋巴菲迪比高美斯嘅入波擊敗「紅魔鬼」，就肯定令到士氣大振，加上有埋球證保護佢哋免受傷害，咁都只係開出平手盤，實在諗唔到有乜理由唔撐「天鵝兵」今晚贏盤再順手「般」錢。