利物浦上盤「斯」人醒

利物浦上盤「斯」人醒  

歐霸盃32強次回合，比錫達斯想收服0:1嘅失地相當困難，一來佢哋近況超差，二來客軍利物浦呢期狀態火紅，完全擺脫海鮮波形勢，所以足智彩開讓球盤，利記再讓平手、半球都要上盤。（周四3，有線61及201台周五2:00am直播）
比錫達斯喺首回合以0:1不敵利物浦，然後返去土耳其聯賽又作客不敵艾斯基沙希0:1，兩連敗兼繼續冇波入，曾效力紐卡素同埋車路士嘅前鋒丹巴巴亞腳風明顯欠順，而且連同土耳其盃在內，比錫達斯其實累積緊1勝3負劣績，狀態方面的確令人擔心，今晚有主場之利都唔睇好。

紅軍連贏4場狀態佳

利物浦連勝4場，上周英超又以2:0擊敗修咸頓，狀態同埋士氣都無與倫比，巴西外援菲臘比古天奴最近演出對辦，領隊羅渣士盛讚佢係另一個蘇亞雷斯，將成支紅軍撐起，故即使隊長謝拉特呢期唔係場場正選，利記嘅成績都有升冇跌。史達寧已經傷癒，並且喺上場英超入波，而史杜列治復出後亦已取得士哥，加上巴洛迪利破埋個人入球荒，利物浦前鋒線3大殺手都可以擔大旗，對手自然望而生畏，難怪呢排戰績咁好。
唔講你唔知，利物浦已經喺本土聯賽保持連續5場作客唔失波，防守穩健咗好多，出到歐霸相信可以保持，今晚作客土耳其少讓平手、半球，其實只係用半格博全個盤，呢個上盤當然抵玩。