飛燕諾平手盤去「馬」

飛燕諾平手盤去「馬」
 
羅馬近期戰績明顯回落，近5場只係取得1勝3和1負，今晚喺歐霸32強次回合作客荷蘭，預料好難頂得住飛燕諾嘅狂攻，足智彩有讓球盤提供，有主場之利嘅飛燕諾平手盤抵玩，絕對坐走望贏。（周四13，有線61及201台周五4:05am直播）
飛燕諾首回合作客迫和羅馬1:1，有一個作客入球在手，今晚返主場其實以0:0和波都夠出線，但係呢支荷蘭傳統勁旅近況唔錯，上周荷甲更加以3:2力克精英隊，卡森李察士連續兩仗有士哥，腳風相當順，加上杜蘭斯查、恩馬斯、艾亞馬迪同埋保爾迪斯等主力個個有貨交，相信佢哋都唔會輕易放過對手，務求盡快奠定出線席位。

客軍多位主將缺陣

羅馬近10場比賽僅取得1勝，另外和8場，輸1場，好似完全唔識贏波咁，而且球隊近兩仗都係晚節不保，歐霸首回合領先下被飛燕諾追和，意甲喺托迪射入個人聯賽第240球之後，同樣俾維羅納追成1:1完場，球員嘅信心同士氣都受到打擊，而且新加盟嘅哥倫比亞前鋒域陀伊巴保養傷未能披甲，拿積、馬爾干、史杜特文同埋伊度比等球員又要繼續倦勤，羅馬教練魯迪加西亞將會相當頭痕，作客去荷蘭好難有運行。
足智彩今仗開出平手盤，計名氣羅馬大啲，呢個盤口好合理，不過佢哋主場捉到鹿唔識脫角，今次作客唔值得睇好，捧飛燕諾可謂坐走望贏。