阿仙奴讓主「納」入正軌

阿仙奴讓主「納」入正軌 

對阿仙奴主帥雲格嚟講，阿仙奴喺歐聯16強戰首回合遇上法甲球隊摩納哥，係唔贏唔得，百感交集嘅一場賽事；雲格今次首度倒戈舊球會，最理想係首回合數夠開讓主，次回合作客法國留一手，咁咪唔會順得哥情失嫂意囉！（周三9，有線61、64、201、204台周四3:45am直播）

雲格執教阿仙奴之前，曾經執教摩納哥長達7年，對此球會嘅感情一定深厚，今次係佢上任阿仙奴以來首次倒戈舊球會，可惜撞正係歐聯淘汰賽階段，真係好難留力，相信佢好大機會喺主場贏多一球，作客法國咪可以輕輕鬆鬆博和波免傷感情囉！

兵工廠近8場取7勝

呢次係阿仙奴近幾年以嚟，第一次喺淘汰賽階段撞上較弱對手，所以無論球迷定球隊上下，對於晉級都抱好大期望。而事實上，阿仙奴自眾多傷兵復出之後，表現已非常穩定，對上8場賽事佢哋取下7勝，球隊由控球在腳改為防守反擊打法，亦明顯為針對在歐洲賽對強隊時唔會一面倒被大炒，當中復出後嘅奧斯爾狀態迅速冒升，加埋狀態大勇、連續兩個月成為最佳球員嘅辛迪卡索拉，阿仙奴中場創造力在歐洲絕對係頂級之列。唯一令人擔心都始終係一對箭頭質素，不過既然有阿歷斯山齊士在陣，有佢喺前線衝鋒陷陣，基奧特等負責執吓雞已冇問題。

客軍6主將傷停避戰

呢場波阿仙奴喺各方面都一面倒佔優，贏兩三球係應該，但對方摩納哥都知自己事，呢場肯定擺大巴死守，尤其摩納球教練查甸係有能之士，呢場肯定有辦法應付阿仙奴，如果唔係隊中傷兵太多，呢場摩納哥有權守和都唔出奇，但今場摩納哥6個正選，包括古沙華、拉治、卡維奴、泰莫爾巴卡約高、杜拿蘭及恩歷克卡拉斯高，全部唔係有傷就停賽，而呢6人全部係中後場主力，話對球隊冇影響就假，就算查甸再大能耐，都好難化腐朽為神奇。